Íslenski Fjárhundurinn
Íslenski fjárhundurinn, þjóðarhundur Íslendinga, hefur fylgt þjóðinni allt frá landnámi og er órjúfanlegur hluti af sögu og menningu landsins. Á árinu 2025 opnum við einstaka sýningu á Lýtingsstöðum í Skagafirði, helgaða þessari einstöku hundategund og sögu hennar. Komdu og upplifðu þessa einstöku sýningu – fræðsla, saga og upplifun bíða þín!
BLOG
Islandsmyndir Mayers 1836
Ég hef nýlega keypt bókina _Íslandsmyndir Mayers 1836_. Auguste Étienne François Mayer var franskur listmálari sem fór í leiðangur til Íslands með franska landkönnuðinum Paul Gaimard. Vísindarit Gaimards, _Voyage en Islande et au Groënland_, var gefið út eftir heimkomuna, en afrakstur Mayers af ferðinni var meðal annars tæplega 200 myndir. Þar má sjá íslenskt landslag og áhugaverða staði eins og Geysi, Þingvelli, Möðruvelli í Hörgárdal, Mælifellshnjúk og Mælifellskirkju, svo eitthvað sé nefnt, auk mynda af ferðalaginu, heimamönnum og húsakosti þeirra. Það er afar skemmtilegt að fletta í gegnum bókina. Mér er ekki kunnugt um hvort Gaimard hafi skrifað um hunda á Íslandi, en hundar sjást á mörgum myndum Mayers. Oft virðist um að ræða sama hundinn – gæti hann hafa verið hluti af leiðangrinum? Ég tók saman myndir sem sýna hundinn á þremur mismunandi málverkum, ásamt aðalmyndinni sem fylgir bókinni. Sú mynd var fyrirmynd að koparstungumynd sem listamaðurinn Massard gerði í fimm eintökum árið 1842. Ég var svo heppin að eignast eitt þeirra og hef, þrátt fyrir mikla leit, ekki fundið annað eintak. Er hugsanlegt að þetta eintak, prent númer 1 af 5, sé jafnframt það síðasta sem enn er til? Hvað sem því líður mun myndin, sem mér þykir afar vænt um, verða til sýnis á sýningunni.
Hver er staða íslenska fjárhundsins í dag?
Fyrir nokkrum dögum birti Hundaræktarfélag Íslands (HRFÍ) [tölfræði yfir hvolpaskráningar síðasta árs](https://www.facebook.com/photo/?fbid=1408926503736202&set=pcb.1408927423736110). Íslenski fjárhundurinn var í fimmta sæti með 100 skráða hvolpa úr 21 goti. Til samanburðar var Labrador Retriever í fyrsta sæti með 374 hvolpa úr 55 gotum. Deild Íslenska fjárhundsins barst á síðasta ári bréf frá lektor við Háskólann á Hvanneyri, þar sem fram kom að Erfðanefnd landbúnaðarins væri að gera landsáætlun um verndun og varðveislu erfðaauðlinda í íslenskri náttúru og landbúnaði til næstu fimm ára. Þar er sérstakur kafli um íslenska fjárhundinn, og óskað var eftir upplýsingum um fjölda lifandi íslenskra fjárhunda á Íslandi og erlendis. Eins og [fundargerð stjórnar DÍF](https://www.dif.is/Deildin/fundargerdir_skoda.php?no=171) gefur til kynna, er Ræktunarstjórn DÍF nú að vinna úr sínum skýrslum til að fá raunverulega stærð stofnsins á Íslandi í dag. Það verður mjög áhugavert að sjá hver stærð stofnsins er í raun, þar sem [gagnagrunnurinn](https://www.dif.is/hundarnir/hundar_grunnur_allir_skradir_hundar.php) sýnir einungis fjölda skráðra hunda hjá HRFÍ frá upphafi. Þeir eru 4503 talsins þegar síðast var gáð, en ekki er hægt að sjá nákvæman fjölda lifandi hunda í dag. Ég fann [grein frá 1988](https://timarit.is/page/4051151#page/n1/mode/2up) þar sem fram kom að aðeins 100–200 íslenskir fjárhundar væru til, og að miklar áhyggjur hefðu verið af smæð stofnsins og þeirri áskorun að viðhalda nægilegum erfðafræðilegum fjölbreytileika. Þar kom einnig fram að skilningur Íslendinga á því hversu mikil gersemi íslenski fjárhundurinn væri, hefði verið frekar lítill á þeim tíma. Hins vegar var mikil eftirspurn erlendis frá eftir hreinræktuðum hvolpum frá Íslandi. Nú spyr ég – kannski einu sinni enn – hefur það breyst? Er skilningur Íslendinga á þjóðarhundinum okkar meiri nú en fyrir 37 árum? Ég get ekki borið það saman þar sem ég flutti til landsins árið 1995, en mér finnst Íslendingar almennt vera meðvitaðir um sinn þjóðarhund. Það eru einnig fleiri hundar nú en árið 1988, en ég myndi vilja sjá enn fleiri íslenska fjárhunda – ekki síst sem bæjarprýði og vinnufélaga bænda. Í greininni frá 1988 kemur fram að verð á hvolpi á þeim tíma var 30.000 ISK. Í dag er verðið í kringum 350.000 ISK, sem er, eftir því sem ég best veit, lægsta verð fyrir hreinræktaðan hvolp með ættbók frá HRFÍ. Því ætti verðlag þjóðarhundsins okkar ekki að vera hindrun fyrir þá sem vilja eignast íslenskan fjárhund og þar með styðja við stöðu þessarar þjóðargersemi.
Nýr styrktaraðili - Royal Canin
Ég hef nýlega gert samning við Royal Canin, sem verður styrktaraðili sýningarinnar um sögu íslenska fjárhundsins. Það gleður mig sérstaklega að vinna með Royal Canin, sem hefur lengi stutt við íslenska fjárhundinn og er einnig styrktaraðili Deildar íslenska fjárhundsins (DÍF). Að fá þetta traust og stuðning við sýninguna er mér mikill heiður og staðfestir mikilvægi verkefnisins. Ég hlakka til samstarfsins! [Hundafóður](https://dyrheimar.is/collections/hundafodur) [Fræðsla](https://dyrheimar.is/blogs/fraedsla)
HAFA SAMBAND
Lýtingsstaðir, 561 Varmahlíð.
Phone: +354 893 3817
[email protected]
HAFA SAMBAND
Sími: +354 893 3817
[email protected]
