24.02.2025Evelyn Ýr
Vaskur frá Þorvaldsstöðum í Breiðdal var einn af átta hundum sem Mark Watson keypti á Íslandi og flutti til Kaliforníu á sjötta áratugnum til að rækta íslenska fjárhunda og koma í veg fyrir að þeir yrðu útdauðir.
Fyrir utan Vask sem flutti út árið 1956, vitum við nöfn fjögurra annarra hunda:
Bósi frá Höskuldsstöðum (1955, Blönduhlíð/Skagafjörður)
Brana frá Hvanná (1955, Jökuldalur)
Konni frá Lindarbakka (1956, Breiðdalur)
Auli frá Sleðbrjót (1956, Jökulsárhlíð)
Fljótlega eftir að hundarnir komu til Kaliforníu kom upp hundapest og sumir hundanna drápust. Watson flutti síðar aftur til Englands og tók þá hunda sem lifðu af með sér.
Vaskur lifði hundapestina af og flutti með Watson til Englands. Þar vakti hann athygli á Crufts-sýningunni árið 1960. Hann keppti í flokknum „Any Variety Not Classified at this Show“, sem var blandaður flokkur, og hlaut þar fyrsta sæti. Dómarinn, Mrs. W. Barber, hafði þetta að segja um Vask:
„Vaskur completely won me over as a good-looking, medium-sized dog. Sound and with the essentials of his breed standard clearly defined, he was a happy and friendly dog to meet and appeared to be enjoying his outing.“
Vaskur var dæmdur í flokkunum „Novice 1“ og „Open 1“.
Hundaræktarfélag Íslands (HRFÍ) var stofnað árið 1969 á Hótel Sögu í Reykjavík. Eitt helsta markmið félagsins var að vernda og rækta íslenska fjárhundinn.
Mynd af Vaski frá Þorvaldsstöðum var síðar notuð sem fyrirmynd að merki félagsins.
Deild íslenska fjárhundsins (DÍF) var stofnuð árið 1979 og starfar innan HRFÍ sem ein stærsta deild félagsins. Merki deildarinnar er það sama, nema að Vaskur horfir í hina áttina.
Sími: +354 893 3817
[email protected]